版权归作者所有，转载请注明出处
唔知你有冇听过"听日先啦大法"
青年危机无非系
人又老 钱又冇
头发甩到成地系
拖友唔知边度有
你觉得系讲紧笑 一笑置之
但系 谂深一层
或者你已经置身噉嘅困境入边
冇作为 便有危
年轻有为 年轻有危
上个礼拜六去咗广州
睇嘉峰嘅"年轻有危"栋笃笑
话就话系栋笃笑 有讲有笑
其实都几写实噶
人生得意须尽欢 有乜留翻听日先
吃喝玩乐在当下 废寝忘食喺听日
就好似嘉峰话斋
大家都系"听日先啦大法"践行者
唔难发觉 我常用嘅关键词都系
寻日 早几日 前一排 甚至乎系旧年
因为我自己就系拖延症患者
写嘢都会延迟个三五七日咯
到依家仲话自己"隐形贫穷"
其实你都穷得好明显了喔
啲工资简单嚟简单走 个个月清袋
对每个月得几千蚊工资呢件事
有清晰嘅定位 已经冇晒期望
就谂住早啲瞓可以发梦梦到发达
或系买福利彩票几时侥幸中头奖
好似我呢啲fans呢 就系理性消费型
睇场栋笃笑啫 唔洗做VVVVVIP
买前小小 稍微睇得到人就得啦
"Love you four hundred and eighty"
有次系朋友屋企食饭
见到佢梳妆台面摆住支
好似巨型风油精咁嘅嘢
我仲问佢买咁大支阿婆香水做咩
原谅我无知 读得书少 见识短
嗰樽青哔哔嘅嘢系生发液
真系 so sorry to hear that
廿岁出头就开始甩发秃头
茶籽油 育发液 生姜洗头水
唔梳头 唔洗头 多食黑芝麻
只要护理得早 脱发追唔到我
切 唔好自己呃自己啦 由佢啦
啲头发今次唔甩 话唔埋下次就甩啦
听歌 煲剧 睇淘宝
挨夜 打机 刷微博
日日懵剩剩 翻工等收工
礼拜就污搲邋遢 懒懒闲
想做嘅事太多 但系乜都做唔好
一冇目标 二冇理想
三冇资源 四冇背景
简直就系"四冇青年""穷二代"
大家都系廿岁出头
对未来迷茫 唔知何去何从
其实都好正常 做乜都有个过程
以前钟意嘅嘢 依家觉得唔一定要拥有
以前唔钟意嘅嘢 依家可以接受同理解
以前惊嘅嘢 依家会继续惊但系会面对
如果你突然间发觉 自己有危机感
咁就证明你醒咗啦
因为一直训紧嘅人系唔会知道
自己身边已经处处系危机
成年人嘅世界
永远都冇"容易"两个字
如果冇办法改变现状
咁就勤力啲去适应环境
人生不如意事十常八九
不如活在当下 努力奋斗
一齐加油喇！！！
