版权归作者所有，转载请注明出处
#丸子食在澳門＃裝修有格調嘅泰國餐廳
一到餐廳門口，未試食物，就已經畀佢簡約風嘅格調吸引，幽暗嘅室內，幾盞由條型木片組成嘅燈，帶來格外舒適嘅視覺感受，暖光微微透出，令空間染上一層神秘嘅輕快感。
紅毛丹冰平時食泰國餐，龍眼冰、椰子冰就飲得多啦，紅毛丹冰你又試過未呀？白雪雪一大杯冰沙真係睇到都覺得凍呀，飲落好甜蜜，仲食到絲絲果肉，食完辣野飲番啖真係爽！
炸通菜咬開酥脆嘅外皮後，裡面嫩綠嘅通菜依然保持住新鮮蔬菜嘅爽嫩多汁，再加上味道層次豐富嘅香辣醬汁～真係好好味。
烤豬頸肉切成薄片嘅豬頸肉泛著焦糖嘅色澤，非常誘人，經過烤制後油脂同肉質融為一體，爽口又多汁，口感極佳，令人回味無窮。
烤雞肉串烤到外焦香內嫩滑嘅雞肉粒，沾上沙爹醬一齊送入口，醬香濃郁，肉嫩而汁多鮮美。
烤鱸魚用鹽包實成條鱸魚去烤，鹽味溫和咁滲透魚肉，魚嘅鮮味被緊鎖喺肉中，配搭醬汁更係畫龍點睛，酸甜微辣味道清爽，混合住鹽味同魚鮮味，喺舌尖上綻開。
泰式海鮮炒貴刁，粿條軟硬適中，相比炒粉口感更煙韌Q彈，又少啲油腻感，海鮮料又多粉又夠入味，食落好飽足！
菠蘿海鮮炒飯魷魚圈、蝦仁、青口同呢份炒飯嘅靈魂角色菠蘿粒，喺米粒嘅半遮半掩中炫耀呢份炒飯嘅足料同豐富，啲米粒粒分明又泛著令人垂涎嘅暖黃色，食落又香又Q真係讚。
冬蔭海鮮鍋海鮮拼盤嘅內容望落十分豐富，有番茄、洋蔥、雞脾菇、青口三隻、虎蝦三隻、一啲魷魚同半隻雞。冬蔭湯底落足料，未煮滾已經聞到陣陣香草味，等到煮滾時，更是酸香濃烈刺激食慾！食之前飲番碗冬蔭海鮮湯，真係鮮香味濃，認真好味！
香汁炆豬手啲豬手被醬油染成啡色，表面泛著油光，睇落好誘人。豬手炆得好腍但唔會爛，豬皮保持Q彈柔軟嘅口感，而啲肉則鬆而不散，包含肉汁。
塔拋菜肉碎千祈唔好睇小呢啲肉碎，真係好辣！而辣得嚟又帶住多種香料味，味道層次豐富，用生菜包住食，又有酥軟肉碎香辣肉汁，又有爽脆生菜清甜菜汁，正呀！
椰青大菜榚睇下個大菜糕幾動感～晶瑩剔透，口感爽彈，好誘人！
芒果糯米飯聞落陣芒果味真係好香濃，但可惜呢排唔係芒果季節，啲芒果真係酸咗啲，好彩夠多汁。而糯米飯則太過實，食落就有啲似嚼膠。
青芒果澳門泰國餐廳就多啦，但就真係好少見有青芒果食嘅餐廳，青芒果食落個味道同口感有啲似番石榴，點一下辣鹽，個味道都幾過癮！
泰月亭地址：澳門氹仔奧林匹克大馬路539號花城地下AP座
